مساء الخير ،،


يشهد الله ان هالقسم من أحب الأقسام لقلمي وأحب له الخير والتطور للأفضل دايم ،،

لكن

رغم جهود إدارة القسم والمنتدى ،، إلا إن في تاجرات بنظري لسة مارتقوا للتجارة الالكترونية الصح بطريقة عرض بضايعهم

أو الردود وخلافه


من هالموضوع ،، ياريت كل وحدة تقول وش اللي ما يعجبها بطريقة عرض التاجرات للمواضيع


عشان التاجرات اللي يهمونهم الزباين يهتموا بآرائنا ويعملوا بها ويكسبوا رضا الكل ،،


ملاااااحظة هاااااااااامة : الموضوع عن الانتقادات حول مواضيع التاجرات وطريقتها ومالايعجبك فيها
لا لانتقاد تاجرات معينات ،، وأي رد مخالف سأقوم بإبلاغ مشرفة القسم لحذفه ،،



أنا سأعدد مالا يعجبني ابتداء ،،


1- الصور على العام والأسعار شيكووو على الخااااااااص


هالظاهرة نص التاجرات يسووها ،، إلا اللي واثقين انهم متميزين ،،

حقيقة انا نفسي اقول ان اللي ماتقول السعر على العام هذي اكيد مزودة السعر بشكل كبير عن السعر
اللي يستاهله وتخاف احد يكشفها ،،

يعني اسمحولي ،،
بلوزة واللا ساعة وكل هالسرية بالسعر ،، واشياء غالية بالاف يبيعوها تاجرات ثانيات والسعر على العام قدام
الكل ،، غصب يخلينا نحس بهالشيء ،،



2- ماأحلل ولا أبيح كل اللي تقلد فكرتي و و و

ياسبحان الله !

انا استغرب هالشيء خصوصاً ان نفس اللي يقولوها الافكار هم مو سبّاقين لها ،، يعني ليه هالعبارات

والأرزاق بيد الله مهما اتقلدتي ماراح تخسري دامك متقية الله بنفسك وبتعاملك وبتميز بضاعتك ،، هذا اللي اقدر اقوله ،،


3- عندي فستان روووووعة لونه كذا شريته بس ماطلع على مقاسي ووالله شريته بـ (####) مبلغ من اربع ارقام غالباً ،، والجادة الصور على الخاص

طيب يعني لو حقيقي هالشيء متوفر عندك وغرضك الحقيقي البيع ،، ليه مايكون على العام قدام الكل ؟؟

ممكن احد ماحط بباله انه يشتري بس من نظره له يدخل مزاجه ويعجبه !


4- الصور وحجم الصور


وهذي مشكلة فضيعة يعاني منها القسم ،،

بعض التاجرات الله يهديهم يحطوا الصور بأحجام كبيرة جداً ، وهالشيء يؤدي لنفور الزبونات اللي اتصالهم بطيء

واللا اللي يملوا انهم يقعدوا لين تفتح الصفحة ،،

المفروض تتصغر الصور وبعدين تعرض على الموقع ،، وفي خيار بكاميرا الجوال يخليك تصورينها صغيرة من
الاساس ولا يحتاج انك تصغيرها ببرنامج ولاشيء


5- طريقة رفع التاجرات للمواضيع

بعض التاجرات ترفع موضوعها 50 مرة باليوم ،، يعني اشوف مواضيع موصلة الصفحة السابعة او الثامنة وكلها ردود نفس التاجرة

احس هالظاهرة مو منطقية والمفروض لها حدود معقولة على الاقل ،، يعني كل ساعتين مرة يكفي جدا بنظري


6- عندي شنط واكسووارات رووعه مواصفاتها كذا وكذا بس ماعندي لها صور الحبة بـ 10 او 20 ريال

هالشيء شفته بكم موضوع وشكيت بالتاجرة صراحة ،، يعني البيعة صايرة عمياني

وممكن جدا ان وحدة تستقل المبلغ وتقول مو مشكلة بشتري وبجرب يمكن يكون حلو مثل ماتقول

وبالنهاية يطلع شيء والوصف شيء ثاني ،،



خلاصة قولي اني من رأيي اشوف المفروض كل تاجرة تعرض صور منتجاتها واسعاره بالتفصيل

والخاص تخليه لاكمال التعاملات ،،

مو تخلي الخاص للعرض ،، والموضوع كله يصير مجرد عبارات من نوعية >> ارسليلي على الخاص




هذه وجهة نظري لقسم أتمنى أن يرتقي

وأتمنى مشاركة زائرات القسم بآرائهم حول مالايعجبهم ،، او مناقشتي فيما يتفقون معي به او يختلفون ،،

وأتمنى مداخلة التاجرات لأي تعليق ،، والكل على العين والراس ،،

وأتمنى من الكل التزام اسلوب النقد البناء ،،




كل الود