مــــائدة شهـــر رمضـــان الكريـــم ... حيــــاكم اللـــه [الأرشيف]

**رهام**

08-21-2006, 10:01 AM

بمناسبة قرب شهر رمضان المبارك ومثل ما احنا عارفين كيف الموائد تكون عامره بما لذ وطاب """ وكأن أحنا ميتين من الجوع وخايفين الأكل يطير :))) """ الحمدلله على النعمه
خطرت في بالي فكره وهي ان كل وحد فينا تكتب شنو الأصناف اللي تكون موجوده على مائدة الافطار أو السحور ، ومنها نستفيد من أفكار بعض تتنوع مائدتنا كل يوم .. لكن بشرط اللي تذكر الأصناف تكون على استعداد لكتابة المقادير في حال طلبتها احد الفراشات ...

وانا راح ابدا :)

وجبة الفطور:
الأطباق الرئيسية على مائدتنا هي: المرق والرز الأبيض - التشريبه - اللقيمات - الشوربه وغالبا تكون عدس - الكبه
الأطباق الجانبية التي تتنوع كل يوم ما بين السمبوسه ، المعجنات ، واي نوع باستا او لزانيا ، او اي طبق جديد
المشروبات: الماء - اللبن - عصير الليمون - عصير تانك او فيمتو

وجبة السحور:
ما يتبقى من الفطور لكن الوالد يحرص على الرز واللبن

هذي سفرتنا :) وانتوا يا فراشات شنو سفرتكم ؟؟؟

بانتظار ردودكم وافكاركم المتنوعه والحلوه .. وانشالله رمضان هالسنه غير بفضل افكاركم ومداخلاتكم الحلوه :de43r

.

suzana

08-21-2006, 10:52 AM

هلا فيك أختي العزيزة ،، فكرة حلووووة بجد ،، ومتميزة ..

بالنسبة لسفرة الفطور الخاصة بينا ،، طبعا تختلف من منطقة الى منطقة ..وعادة نقدم للفطور وجبة خفيفة علشان وقت الصلاة ،، ومن بعد الصلاة نكمل بقية الفطور أو العشاء ..

وهي كالآتي ( بشكل عام راح أذكر جميع الأصناف المقدمة عادة ) :

على الفطور :

تمر + سمك مقلي بالحامض ( يقدم معاه الفجل أو الخس ) + أو أرز مع البغيل + أو فتة اللحم والخبز العماني الرقاق + بعض الخفايف مثل: السمبوسة + الكتشوري + الكتليس + المعجنات .+ الباكورة .

على العشاء :

واللي يستمر الى آخر الليل ( على حسب ) :

الشوربة + السمنة + الهريس + اللقيمات + اللوبيا + البيتزا المنزلية + الفطاير + المكرونة بأنواعها ،، وغيره من الأكلات المتنوعة ..

المشروبات:

اللبن ( أساسي ) + فيمتو + تانج + كركديه + شمام ...

السحور:

عادة السحور يكون خفيف عبارة عن أرز ولبن أو أي شي يفضل من الفطور والعشاء ...

**رهام**

08-21-2006, 11:12 AM

شكرا يا أخت suzana على المشاركه واللي راح اسالك عن

ما هي الكتشوري والكتليس ؟؟؟؟ ابي اعرف مقاديره اذا ممكن حتى يكون طبقي الجديد في البيت هالسنه :)

انشالله باقي الفراشات يشاركون معانا :)

.

**رهام**

08-21-2006, 02:08 PM

شكرا يا suzi على الرد وانا بانتظار المقادير يوم السبت انشالله

ووين باقي الفراشات ما يقولون لنا اطباقهم ؟؟؟؟ وين أهل الشام ومصر ودول المغرب ؟؟؟

.

مكارم

08-21-2006, 02:36 PM

هلا والله وتسلمين علي هذه الموضوع المميز طبعا مثل ما قالت اخت سوزانا السفره تختلف من بيت الي اخر واحنا كالتالي

وجبة الفطور:
طبعا اول شي تمر + هريس +اللقيمات + عدس+ كاسترد+وفي اكله ايرانيه كلنا نحبها و هي آش +عصيده الارز الناعم مع النشا +لفائف الفطائر
واما المشروب كالمعتاد لبن +عصير برتقال او مانجو
والعشاء:
مشاوي ( سمك +دجاج و...) + الارز +معكرونيا بالبشاميل + شوربه +البيتزا +السمبوسه +كفتة اللحم المفروم مع البطاطس
والحلويات بسبوسه + كيك + اصابع الاصنافر

والسحور :

شي خفيف مثل خبز ارقاق + جبن + بيض+ روب لازم كل يوم
ولله شوقيتينا لرمضان

**رهام**

08-22-2006, 09:40 AM

شكرا للأخت مكارم على المشاركة ... وواضح ان مائدة البحرين الرمضانية عامرة باكثر من وجبه ما شالله وكلها متنوعه

وانتي ذكرتي اسم طبق وهو .. أصابع الأصنافر ؟؟ هل هي طبق ايراني ؟؟

واحنا بانتظار باقي المشاركات من باقي الفراشات

.

moonlady75

08-22-2006, 11:07 AM

عزيتي رهام ربي يبلغنا الشهر نحن واياكي وجميع المسلمين بخير

اشكرك اختي الكريمة على الطرح الرائع

جزااااااااااااااااااااك الله كل خيــــــــــــــــــــر

مكارم

08-22-2006, 11:29 AM

طريقة عمل آش الايراني

المكونات :
حمص(بليله) فاصوليا حمرا، عدس اخضر
4حبات بصل
3حزم بقدونس
سباجيتي
3ملاعق طعام شوفان
زعفران للتزيين
الطريقه:
1-ينقع كل من الحمص ، فاصوليا والعد س ليله كامله.
2-يخلط الحمص مع الفاصوليا ويوضع علي النار لين ما يستوي .
3-وفي الاخر نضيف العدس لانه ياخذ وقت اقل في التسويه ويترك علي النار.
4-يحمر البصل ويرش عليه الكركم .
5-واخيرا يضاف البقدونس المفروم والسباجيتي و البصل والشوفان ويخلط باستمرار ويوضع الملح حسب الرغبه ويترك لمدة 30 دقيقه لين ما يستوي.
6-يسكب في وعاء كبير ويزين بالزعفران والنعناع الجاف والبصل .

وبالهنا والعافيه

**رهام**

08-22-2006, 01:37 PM

اشكرك اختي مكارم على الرد .. وانا طماعه بعد شوي لاني ابي منك مقادير ( أصابع الاصنافر)

.

**رهام**

08-22-2006, 02:13 PM

شكرا يا Moonlady على المرور .. مع اني كنت اتمنى تذكرين لي شنو الأطباق المميزه على موائد أهل الامارات

.

نجلاء20061

08-22-2006, 05:28 PM

مشكورة على هذا الموضوع اختي رهام..اما بالنسبه لمائدة منزلي الصغير فهي تحتوي على الاتي:الطبق الرئيسي هو ((الثريد))وهو عبارة عن خبز الرقاق و مرق اللحم.+شوربة الخضاروالعدس+كبسة الدجاج+المقالي (سمبوسة و سبرنغ رول و الكبه و الكفته باشكالها +المحاشي بأشكالها+الهريس +الجريش+المكرونات باشكالها+الحلويات الشعبية والبقلاوات والبسبوسة والكنافة و القطايف ...........الخ .........تعبت وانا اكتب.........العصاير الطازجة .........طبعا ً هذا الاكل مو لييييوم واااحد للشهر كاااااامل الله يبلغنا اياااااااااااه اجمعيييييييييييين انشاءالله .................اما السحوووووووور فما تبقى من الفطوووووور لانه كثييييير والحمد لله غير الاكل اللي يجينا من الاهل و الجيرااااااااان .........................وسلامتكم

**رهام**

08-22-2006, 08:28 PM

مشكوره يا نجلاء على المشاركه الحلوه وماشالله مبين سفرتكم عامره بالاكلات الشرقية :)

ام وجدان ولجين

08-23-2006, 01:26 AM

شكرا شكرا شكرا

**رهام**

08-23-2006, 09:51 AM

شكرا على المرور يا ام لجين ... لكن ويد افكار المائده السعودية ؟؟؟

جذابه وحلوه

08-24-2006, 04:08 AM

طبعا احنا ..............وجيراننا ...........نتفااااااطر
يعني كل على واحد الفطور .................وعددهم 7او 6..........

طبعا اذا اذن المؤذن ..........بس يتقهون قهوه وتمر وشويه فطاااااير وحلى خفيف ............

وبعد الصلاة .................
يفطرووووووووووون
الشوربه باللحم .....ولا بالخضره على حسب ...........اتنويع
والمكرونه ............والعاااااام ماسوينا ((يقولون تبذير ))
والمحلبيه والجلي والفطاااااااااااااير والحلى واللقيماااااااااات

وبالوسط طبعا صحن كبير اشوي ..........ويكون هو الوجبه المهمه.......
اما يكون رز ولا تشريبه ولا مثلوثه على حسب ............((جيراننا ))

والسحور .............خبز تنووووووووووووور مهم جدا ............وعليه خفااااايف
وبس ............طولت

كنـ المحبة ــز

08-24-2006, 10:13 AM

مشكوره على هدا الطرح الجميل اما عندي انا فيتكون الافطار من القهوة والتمر اساسي والشوربه والخبز البيتي والسنبوسه باللحم والجبنة واحد انواع السلطه اما تبوله او فتوش او فته ومكرونه بالبشميل وبيتزا او اقماع بحشوات مختلفة او فطائر مشكله ونوع حلا وانا افظل الكنافة لان زوجي يحبها وطبعا العصائر المختلفة واهمها الليمون والفيمتو اما العشاء فهو بقايا الفطور ويكون الساعه 11او12واما السحور فعادة يكون الكبسة او اي شيء خفيف

**رهام**

08-24-2006, 11:02 AM

شكرا يا الحلوه مع انها غريبه اول مره اعرف ان الفطور يكون بالتعاون مع الجيران .. التعاون حلو وكلناس لها عاداتهم وتقاليدهم

واشكرج يا كنز المحبه على مشاركتك

.

جذابه وحلوه

08-24-2006, 12:42 PM

..........لا شكلك ما فهمتي
قصدي مثلا كل يوم عند واحد فطور البيوت الثاااااااااانيه ماااااتسوي شي

مكارم

08-24-2006, 11:04 PM

اسفه يا اخت رهام علي التاخير بس من طول الغيبات ياب الغنايم
طبق اصابع الاصنافر

المكونات:
علبتين بسكويت شاي (اولكر)
علبتين قشطه
سكر حسب الرغبه
حبة موز
حليب
1- يخلط القشطه و الموز والسكر في خلاط الكاس .
2- يغمص البسكويت في الحليب ويصف في طبق ويوضع عليه خليط القشطه و يصف مره ثانيه البسكويت و والقشطه لين ما يخلص المقادير و يوضع في الثلاجه لوقت التقديم.
وبالهنا والعافيه

**رهام**

08-25-2006, 12:27 PM

شكرا يا المكارم على ذكر الوصف اللذيذه
والشكر باقي الفراشات على المرور

suzana

08-26-2006, 10:10 AM

هلا أختي العزيزة رهام ،،

بالنسبة لأكلة الكتشوري فهي على حسب عدد أفراد الأسرة ،،

يعني إنتي اللي تحددين على حسب الذوق والطعم كذلك ..

والمقادير هي :

بطاطس + عصير ليمون + ملح + بقسماط أو طحين دنجو ( حمص ) + بيض + فلفل أحمر ناعم + زيت للقلي ..

الطريقة :

* أولا؛ تسلقين البطاطا وتضيفيله الملح على حسب الذوق ، بعدين تصفينه من الماي وتهرسينه زين بدون ما يكون فيه كتل ..

* ثانياً: تضيفين عصير الليمون أيضاً على حسب الذوق وتتبلينه بالفلفل الأحمر ..

* ثالثاً : شكلي عجينة البطاطس على شكل كور صغيرة أو كبيرة ،، بعدين حطيه بالبيض المخفوق ومن ثم دحرجيهم بالبقسماط أو الطحين الى أن تخلصي الكمية كلها ..

* رابعاً : إقلي الكرات في الزيت ،، حتى يتحمر ،، بعدها شيليه وحطيه في الشخالة أو على طبق فيه كلينكس ماص للزيت .. ويقدم مع الشتني ( الصلصة ) أو بمعنى آخر التغميسة ،، وهي عبارة عن الآتي :

حطي بالخلاطة الكهربائية

( نارجيل + عصير ليمون + قطع فلفل أخضر + ملح + وشوية ماء ) حسب حاجة الصلصة ..

ملاحظة :
ممكن تظيفين البقدونس المفروم للخلطة ،، أو اللحم المفروم ...

وبالهناء والعافية ..

suzana

08-26-2006, 10:14 AM

بالنسبة للكتليس :

نفس الطريقة ،،

بس الاختلاف هنيه إنك تضيفين للبطاطس السمك أو ممكن تستبدلينه بالتونة إضافة إلى الفلفل الأسود بدل الأحمر

وبعدين عاااد تشكلينه على شكل أصابع ،، وهكذا ؟؟

أتمنى أكون أفدتك يالغالية ..

suzana

08-26-2006, 10:15 AM

على فكرة نسيت أقولكم ،،

إنه حتى إحنا بعد بالاضافة للأكلات السابقة نقدم

( المهلبية والجلي ) ...

**رهام**

08-26-2006, 12:58 PM

شكرا شكرا شكرا يا suzana على ذكرك للوصفات

وانا اعجبتني اصابع البطاط

.

suzana

08-27-2006, 10:51 AM

تسلمين يالغالية ،، هذا من ذوقك ..

وأشكرك من كل قلبي على فكرة الملف المتميزة فعلا ..

ذكرتينا برمضان

وشوقتينا كثييييييييييير

**رهام**

08-27-2006, 10:57 AM

حياك الله واذا عندك اي افكار لا تبخلين علينا :)

.

suzana

08-27-2006, 01:21 PM

إن شاء الله عزيزتي ..

وأنا بعد راح أتعبك معاي وأطلب مقادير بعض الوصفات ..

تمام ؟؟

**رهام**

08-27-2006, 02:10 PM

مو مشكله انا مستعده لاي وصفه تطلبينها :)

.

suzana

08-29-2006, 08:19 AM

وين البقية ،،

بصراحة الفكرة حلوة وحابين نتعرف على أكلات من كل البلدان العربية ..

**رهام**

08-29-2006, 10:05 AM

ماادري وينهم ؟؟ الظاهر ما لهم مزاج يشاركون

يمكن اذا قرب رمضان يشاركون ؟!!

suzana

08-29-2006, 12:23 PM

على العموم ،،

مثل ما قلتي بالضبط لما يقرب راح يدخلون الملف إن شاء الله تعالى ..

حنين 2006

09-01-2006, 02:27 PM

اهلين بنات كيفكم
على الافطار احط التمر وشوي معجنات وشوربه علاحسب الي مشتهي زوجي
وبعد صلات المغرب احط المكرونه والمعجنات والكسترى والجلي والاعصير وبعد التراويح يعني متاخرشوي فواكه وسحور زوجي العزيز يحب لارز والبن يعني كليوم اصلح نوع رز وذكان في الدوام اكبر مخدتي ماصلح شي الامعجنات علشان ولدي يحبها وشوربة كويكر وسحوري انا يكون فاكهه وتسلمو

http://www.pic.alfrasha.com/data/media/82/candy0042.gif (http://www.pic.alfrasha.com/details.php?image_id=21709)

همسات حزينة

09-01-2006, 10:38 PM

مشكورة اختي موضوعك حلو وانا الحين ببتدي الفطور تمر والشروبة شروبةعدس وشروبة الشوفان وورق عنب وكوسا محشي
وصينة بطاطس في الفرن وكفتة بطاطس وكفتة لحم ودجاج وكباب ومسقعة وسمبوسة وبريد بالدجاج وبريد في الفرن واللقيمات واصابع الجبن و المعجنات من بيتزا وكروسان وعش نحل وفطائر يعني منوع وكشري وعصيده وهريس وكيك مثل كيكة الجبن ودانة كيك وكيكة الجزر والبسكوت بسكوت الزنجبيل والغريبة والبسبوسة والايسكريم بالشوكلاتة وغيرة وسلطة وسلطة فواكه والعصيرات عصير تنج وكوكتيل وليمون طبيعي ومانجو ولبن وماء والسحور رز طبعا

**رهام**

09-02-2006, 09:55 AM

ماشالله .. الكل متفق على شوربة العدس :)

خلاص انا ناويه السنه هذي اغير نوع الشوربه

.

ورد الرفاع

09-03-2006, 08:26 AM

إحنا في البحرين الصراحة لازم نبدي الفطور بالتمر بعدين الطبق الرئيسي في كل بيت بحريني هو الثريد شي أساسي + الأرز إذا كان مجبوس أو في قاعته (شبية البرياني) بس أغلب الناس ما تاكل سمك في الفطور السمك يبقي للسحور للقبكات الحلوة + طبعاً السمبوسة والسلاطات آنا لازم كل يوم فتوش + المعجنات + اللقيمات + الكباب (لازم )
أما وجبه السحور فتكون خفيفة أي شي إلا إذا كنا معزومين على السحور

suzana

09-03-2006, 08:33 AM

رهام

حبيبتي وينك مو مبينة اليوم ؟؟

**رهام**

09-03-2006, 08:57 AM

مشكوره يا ورد الرفاع وانتوا عاد اهل البحرين معروفين باكلاتكم الحلوه ةالغنيه بالبهارات

حياج Suzana انا موجوده كل يوم :)

.

suzana

09-03-2006, 01:17 PM

هلا عزيزتي ،، الحين شفت ردك ..

بس بغيت أستفسر عن أكلة مشهورة عندكم وااااجد

إسمها ( البلاليط )

إذا ما عليك أمر ،،

حبيت أعرف ويش هي ؟؟

ومقاديرها مع الطريقة .. من كثر ما أسمع عنها متشوقة أتعرف عليها أكثر ..

**رهام**

09-03-2006, 01:46 PM

اوكي يا سوزان

البلاليط هي باختصار باستا حلوه لكن يتم استخدام نوع معين من الباستا وهي الاسباكتي الضعيفه ويكون سكلها اصغر واضعف من الشكل المعتاد
تسلقين الباستا وتخلينها على جنب
في جدر منفصل تحطين سوية سمنه او زبده مع هيل ودارسين وتحركينهم شويه وتضيفين عليها الباستا والسكر وتحركينها هتى يذوب السكر وتشوفينها تاخذ لون أحمر

وعند التقديم البعض يحط عليها قرص بيض مقلي ... ويرشون عليها هيل زياده
والبعض ياكلها بدون بيض

هذي هي باختصار البلاليط

.

هدى888

09-04-2006, 05:56 AM

احنا الفطور الوجبه الرئيسيه الفول والتميس 00000 والسمبوسه بانواعها بالجبنه السائله واللحمه والبيض 0000بسبوسه كنافه طرمبه0شوربه باللحم0 ادام تونه باللخم ههههههه بيتزا سبرينغ رول عصيرات تانج مانجو برتقال فيمتو حلا منوع يعني كل يوم شي
والعشا بيض عيش جبنه ماتبقا من الشوربه شاي
السحور ثقيل ارز مع سمك او خضار او لحمه او دجاج المهم الارز وجبه رئيسيه او دجاج الفروج او البيك
هذا احنا اهل جده كذا فطورنا اي شي انا بالخدمه

هدى888

09-04-2006, 05:57 AM

نسيت التمر او الرطب الروثانا

suzana

09-04-2006, 08:35 AM

تسلمي أختي رهام على المعلومة ،،

ما تقصرين عزيزتي ..

**رهام**

09-04-2006, 10:02 AM

مشكوره يا huda

عندي استفسار من بنات السعوديه .. ايش هو البريد ؟؟ والبعض كاتب البريد والدجاج ؟؟

.

**رهام**

09-04-2006, 10:03 AM

ايش هو الروثانا يا هدى ؟؟

tamtam

09-05-2006, 01:08 AM

عزيزتي رهام اولا يعطيج العافيه على هالفكره الحلوه والله عجبني موضوعج حييييييييييييل اما سؤالج عن البريد هو التوست ومشكوره عيوني

هدى888

09-05-2006, 03:50 AM

الروثانا اللي هو الرطب الاصفر والاحمر او البلح

**رهام**

09-05-2006, 09:55 AM

شكرا على سرعة تجاوبكم

.

ام البتول2006

09-07-2006, 10:19 AM

هلا حبيبتي كل عام وانت بخير
حنا سفرتنا الفطور ( طبعا التمر_ سمبوسه _ فتوش اذا ما حطيته طبعا بيشنقني زوجي هههههههههه _ شوربه _ مكرونه )
المشروبات ( فيمتو ولبن )
السحور ما تبقى من الفطور وبعض الاحيان نسوي كبسه وشكرا عيوني موضوعك حلو