يامـن يخـل القلب عنده ليــن أجـيـه؟

[آهـات الصمت]

يامن يخل القلب عنـده ليـن أجيـه؟
عـدّة دقايـق لانـهـار ولا سـنـه
لي حاجةٍ فالسـوق حدّتنـي عليـه
مكتـوب والمكتـوب شـيٍ ماعنـه
وانا بليسـي فالسّعـه بلشـان فيـه
وش لون وانا وسط جنـده ووطنـه
اخـاف يـرم الله قلبـي فـي يديـه
ويعرّضـه مجمـول يقطعنـي منـه
ويضيع قلـبٍ لاحريـص ولانبيـه
امنين ماهب الهـوى سـاق ضعنـه
قلبٍ عسى الله يصلح أمـره ويهديـه
يسوقنـي للمـوت ويقيـس كفـنـه
هـذا يبيـه وذا يبـيـه وذا يبـيـه
وانا أردعـه بالعقـل وأتـلّ رسنـه
عاقل لكن قلب الهوى مثـل السفيـه
اليا أعترض له زين الاوصاف شطنه
لو كان مايرضى على العرض النزيه
ولاأذكـر انّـه بالمحاذيـر طعـنـه
ولايعكّـر صفـو بيضـان الوجيـه
اللي تسوق الطيـب شامـه ويمنـه
لكـن يشهيـه الجمـال ويشتهـيـه
ويحـرك شعـوره وقافـه ولحنـه
اليـن يرميـه الهـيـام ويشتـويـه
ويقسّمـه مابيـن نـاره وصحـنـه