كلك خيانة ...

[ثويبة]

جيت ابنسى و أتراجع وأسامحـك
صاحن جروحي واشتكن لي طعونـك

كلك خيانة قول .. وشلـون ابمنحـك
وش موقفك من شخص دايم يخونك

اكبر خطا .. لو جيت يمـك أصالحك
أول تحـوّل .. لا تـغـرّك إلحـونـك

اللي تقوله صح .. لو كنـت جارحـك
مير أنت غارق للأسف في ظنونـك

وصفك نسيته بس .. باقي ملامحـك
بنهيـك وانهـي بالنهاية جنـونـك

ما تستحـق أمـد كفـي وأصافحـك
مثلك غلط عمري وأبحيـا بدونـك

لعبـت دورك شاهـدت مسـارحـك
خدعتنـي وأظهـرت خافـي فنونـك

كنت اعتقد قلبي هو ابرز مطامحك
اللي يبيـع النـاس لجلـه يصونـك

تعبت أسوق الشوق يمك وأصارحـك
أخلصت لك بالحب شوفت عيونـك

لكن خسارة صرت غايـة مصالحـك
يا ليتني ما جيـت لحظـه بكونـك

بالأمس كنت بنشوة الحب أمازحك
أخيل برقـك وأتحـرى مـزونـك

واليوم من صفحة حياتي ابمسحـك
هديت صرحـك ثـم طاحـت ركونـك

ولابي عيوني لـو تصـورت تلمحـك
أعلنت موتك وانسجن لي كفونـك

وان جيت تطلب ترتجيني أسامحك
بهديك طعنه مـن بقايـا طعونـك

منقول