المساعد الشخصي الرقمي

مشاهدة النسخة كاملة : نفاس وبالغربه وعلى رمضان....وش الاكل المناسب لها؟؟



همس وتناهيد
08-25-2007, 02:52 AM
السلام عليكم ورحمه الله وبركاته
عزيزاتي حبيت استفيد منكم معلومات بالنسبه للاكل للنفاس .......لاني رح اولد وانا بعيده عن اهلي وبالغربه يعني مافيه الازوجي يسوي لي اللي يقدر عليه واكيد انا بنفس نفسي خصوصا بنكون على رمضان يعني هو صايم وانا مفطره ........يعني بيكون اكلي على المطاعم والمطاعم هنا اللهم لك الحمد وكلها اكل غيرمفيد للنفاس
فيا حبيباتي وعزيزاتي ابيكم تعطوني افكار ممكن اسويها قبل الولاده مثلا افرزن كشنه للشوربه ..اومثلا اطبخ تمر واحتفظ بمويته عشان اسوي فيها زي المحلى مثلا........ابيكم تقولون لي وش ممكن افطر وايش اتغدى وايش اتعشى ........خذوا في بالكم انا بغربه وما عندي اغلب المقادير .........بس ماهي مشكله ربنا ييسرها ويعدي نفاسي واله يعين ابو الشباب ما يلقا له مين يسوي له فطور وسحور بيتذكر ايام العزوبيه....
هاه
ترا انتظر ردودكم

همس وتناهيد
08-25-2007, 02:55 AM
وكمان ودي اعرف لو بسوي كشنه للشوربه كم يبيلها بالفريزر ما تخرب

وعــــد الرياض
08-25-2007, 03:11 AM
الله يكون معك نفاس وغربه والله صعب واللي ينفسك زوجك

بس هونيها وتهون الفطور احنا نسوي مصابيب بس عليك صعب خليها بيض مسلوق وحليب

والغدا قرصان هذا سهل ولذيذ ومناسب للنفاس او مرق خضار مع خبز بر او مرقوق خاااصه انه جاهز اللحين

والعشاء انتى حره انا ممكن يكون جبن وطحينيه يعني نواشف

ولاتنسي الحلبه كل يوم اطبخي لك حلبه وكثري من الحليب هذا افضل شيء للنفاس واكل التمر بعد مهم

وافضل شيء تجهزينه ولا يخرب من الفريزر السمبوسه سوي منها كميه وفرزنيها وكبه بطاطس
او كبه تونه تحضيرها جدا سهل وتصلح تفرزن بس مو وقت طويل

والفطاير بعد سوي كميه وفرزنيها خااصه عشان زوجك
اما بخصوص الكشنه حقت الشربه تحضيرها مره سهل ماتسوى انك تفرزنينها

اتمنى اكون اعطيتك معلومات تساعدك والفراشات ماراح يقصرون

همس وتناهيد
08-25-2007, 11:12 AM
الف شكر وعد الرياض ........بالنسبه للمصابيب انا احبها بس يبيلها وقفه على الفرن واحس اني بكون تعبانه وثاني شي القرصان انتي تقصدينه اللي تشترينه جاهز وتحطينه على المرق هذا والله احبه بس مخلص من عندي لاني كنت جايبته من السعوديه وهنا بامريكا ما عندنا قرصان ......والمرقوق كيف يتسوى .....اللي اعرفه يبيلها عجينه وزحمه ورق ووقفه على الفرن واحس النفاس ما تقدر على كل هالوقفه..........على العموم تسلمين....
وش رايكم وحده تقولي فرزني شوربه كويكر بس بدون لحمه وحطيها باكياس ينفع ولالا

النفس البريئة
08-25-2007, 12:10 PM
الله يعينك اختي انتي فرزيني الفطائر والمعجنات ولو تصلحين معجنات بالبر لك وبالنسبة للشوربة خلي زوجك

يستحمل ومهوب لازم كويكر شوربة ماجي السريعة على الاقل العشر ايام الاولى وبالنسبة للمرقوق قولي لاهلك

يرسلون لك المرقوق والمطازيز الجاهزة واول ماتوصلك بالفريزر وطريقتها سهلة تصلحين مرقة وتحطي اللي

يكفيك من العجين ونص ساعة الى ساعة الا ربع تطبخ على نار هادية هذا بالنسبة للغداء والفطور مثل ما قالت

وعد الرياض بيض مسلوق الاسبوع الاول لين تتنشطين شوي ثمن بتقدرين تصلحين لك مصابيب وطريقتك بالنسبة

تعصرين التمر للمحلى هذي بعد زينة مع الحليب وكلي حبة سوداء ورشاد بتلقينها في البقالات الهندية والعشاء مع

زوجك تعشي بس لاتأكلين مقالي هونيها وتهون وان شاء الله البنات اللي عندك مو مقصرين وبيرسلون لك فطور

لزوجك الله يهون عليك ويسهل ولادتك

همس وتناهيد
08-25-2007, 01:43 PM
النفس البريئه مشكوره على الرد والله يعيني بس هنا ماشفت عندهم شوربات زي ماجي وخرابيط بعدين شوربه كويكر حلوة للنفاس بس هل تصلح انها تتفرزن كمان افكر اسوي شوربه بيضا وافرزنها لكن هل تضبط مدري...........انا مره رحت لمطعم وعجبتني شوربتهم وقلت لهم ابي المقادير عطتني ا لورقهومكونات الشوربه هيه تقريبا مشابه للبيضا وقريت اخر شي انها تحفظ لمدة شهرين بالثلاجه بعد مو بالفريزر فعشان كذا افكر اسويه بس على الفريزرعلى طول....بالنسبه للمرقوق والمطازيز الجاهزه ممكن تشريحينها لي

عاشقة الاسحار
08-25-2007, 02:52 PM
اختي الله يعينك لكن شدي حيلك ايام الاربعين ماتعوض سوي لك عجينة مطازيز طحين وماء وتعجني حتى تكون عجينه متماسكه وقاسيه شوي وبعدين تفردين العجينه بس ماتكون سميكه وتقطعينه بكاسه على شكل دوائر وترصينه بصينيه مرشوشه بطحين على شان ما تلزق وتدخلينه الفريزر الي ان تجمد وبعدين تحطينه بعلبه اوكيس لحم وتعيدين الكره والحكمه من تجميده قبل على شان مايلزق المطازيز ببعضه واذا بغيتي تسوينها تطبخين مرق لحم وخضار وبعدربع ساعه تحطين المطازيز لين تستوي

النفس البريئة
08-25-2007, 04:33 PM
أختي همس وتناهيد طريقة المطازيز ماقصرت عاشقة الاسحار

يالنسبة للجاهزة تلقينها في بساتين القصيم في علب بلاستيك مكتوب عليها مطازيز وبالنسبة للمرقوق تكون

موجودة في اكياس بلاستيك عجينة مستوية نص استواء تشبه خبز رقاق وصي اهلك يروحون لبساتين القصيم

وبيلقونها ان شاء الله وبالنسبة للشوربة والله ماعندي خلفية عنها هل تنفع بالفريزر اولا ومادامك لقيتي طريقة

الشوربة البيضاء وتنفع في الثلاجة شهرين مافيها كلام سوي كمية تنفع اسبوعين من رمضان

اليوم وانا الف على المنتدى قريت وحدة تقول تأخذين تمر وتطلعين النوى منه ثمن تعجنينه مع شوية سمن وحبة

سوداء تكورينها سوي لك كمية منها تقول انها زينة تأكلينها على الريق مع حليب دافي وبعدها بساعة تفطرين


والله اني حاسة بك اختي غربة والحالة صعبة انتي بكرية والا سبق ولدتي الله يهون عليك .

همس وتناهيد
08-26-2007, 11:29 AM
عاشقة الاسحار الف الف شكر عجبتني طريقتك والحين انشا الله بروح اسويها

همس وتناهيد
08-26-2007, 11:32 AM
النفس البريئه الف شكر لك وعلى احساسك فيني.........تراني خلقه هامه .....وتوني الحين استوعب واقول وش اللي خلاني هنا كان رحت اولد عند اهلي.........لكن الله ييسر...رح يكون اكبر اختبار لي.....والله حبيبتي بكريه......وتوني متزوجه الصيف اللي راح ............وعمري 19.........عطيتك البطاقه كلها.......ههههههه

همس وتناهيد
08-26-2007, 12:55 PM
وين التفاعل..................افا..........ماتوقعتها منكم يالفراشات

النفس البريئة
08-26-2007, 05:32 PM
النفس البريئه الف شكر لك وعلى احساسك فيني.........تراني خلقه هامه .....وتوني الحين استوعب واقول وش اللي خلاني هنا كان رحت اولد عند اهلي.........لكن الله ييسر...رح يكون اكبر اختبار لي.....والله حبيبتي بكريه......وتوني متزوجه الصيف اللي راح ............وعمري 19.........عطيتك البطاقه كلها.......ههههههه

ياعمري لساك صغنانة :h45r4 بس هونيها وتهون ومدامك لسا عروس زوجك بيهتم فيك ولا راح يكلفك شي وغير انه بيصير مبسوط من قدوم اول مولود له لاتشيلين هم وريحي بالك والله يقومك بالسلامة

ان شاء الله الفرشات ماراح يقصرون :fkjuiyhag

همس وتناهيد
08-27-2007, 10:07 AM
النفس البريئه مره شكرا....على التفاعل..........وينكم يالفراشات طيب كلمه ولو جبر خاطر

GLORIOUS
08-27-2007, 12:48 PM
اختي همس وتناهيد الله يقومك بالسلامه ويهون عليك ولادتك
شوفي اختي انا ولدت اول مولود لي بأمريكا وكانت فتره اختبارات زوجي وكنت قلقاااااااانه مره وخايفه من التجربه..وكنت احسب موضوع النفاس كبيييييييير لكن الحمد لله صار شي سهل وما توقعت انه بيمر علي بسهوله ولله الحمد وعقبالك يارب
طيب في البدايه انتي بأي ولايه يمكن تصيرين عندي عشان اساعدك وقت ولادتك حبيبتي...شوفي بقول لك وش الاشياء اللي سويتها ايام نفاسي..اول يوم ولاده لازم تهتمين بأكلك مره يعني خلي تجهيزك كله للأيام الاولى..يعني علمي زوجك طريقه قهوة النفاس وطريقة التمر بالحلبه (هذا ممكن تسوينه انتي قبل وتجهزيه وتخليه بالفريزر وهو بس يحمي لك)هذي الاشياء اليوميه وباقي الاشياء ممكن كل شي يجهز لك كل شي بيومه..يعني ركزي على الشوربه ومو لازم تسوي لها كشنه من قبل ولا تستخدمي بصل الطازج وتتعبي حالك استخدمي بودرة البصل وهذي سهله اللهم مويه حاره وبورده بصل وصلصه طماطم وشويه بهارات مع الكويكر وتصير لك شوربه ولا احلى..بس احرصي على شرب الحلبه والحبه السوداء وكثري تمر واهتمي بلبسك يعني تدفيييييييي والبسي شراب وبنطلون تحت ملابسك(لا تغلطين غلطتي كنت ما اتلبس زين بالنفاس والحين الله لا يوريك المشاكل اللي عندي بسبب لامبالاتي بموضوع اللبس وما كنت اتصور ان الموضوع مهم مره)وبس اكل زوجك هو اللي جهزيه من الان مثل السنبوسه والمعجنات الي ممكن تتفرزن بحكم انه بيكون صايم الله يكون في عونكم..
واي سؤال انا حاضره اختي
والله يسهل امرك ويعينك ويتمم عليك

همس وتناهيد
08-27-2007, 01:09 PM
محبة الرحمن 11 هلاوغلا........ززانا ياطويله العمر موب بلوس انجلوس .......انا بولايه بالوسط ........لو بقول وشي كلن عرفني لاني الوحيده اللي هذا شهره هنا......حبيبتي يوم شفت ردك هانت علي بس بسالك كيف تسويين التمر بالحلبه.......يعني تحمسين التمر مثلا بزبده وشويه حلبه بعدين تفرزنينه ولوفرزنته ما يخرب ويخرب ريحه الثلاجه ولا عادي................اما سالفه اللبس هذي الله يعين خصوصا هالايام بدايه برد وانشا الل آخذ بنصايحك........سرني ردك والله

همس وتناهيد
08-27-2007, 01:31 PM
ايوه .........محبه الرحمن11 حبيت بعد اسألك وش مكونات قهوه الحريم يعني انتي تقصدين اني مثلا اخلط قرفه ومسمار ووووو..........او قهوه الحريم اللي تنباع مخلوطه مع بعض

GLORIOUS
08-27-2007, 03:31 PM
هلا والله
ايوه التمر بالحلبه مثل ما قلتي..تمر وشوية زبده وحبلة مطحونه(هذي تكون معاها اعشاب ثانيه مثل عشبه اسمها_ماش_اذا تعرفينها_انا جبتها معي من السعوديه جاهزه)واضيفي معهم فلفل اسود بس لا تكثرين عشان راح يطلع مع الحليب الرضاعه للبيبي اذا انتي تبين ترضعين طبيعي وانصحك ترضعين طبيعي..يعني حطي فلفل بس موكثير
وبرضوا نفس التمره هذي سويها بأخر 20 يوم نفاس واقطعي الحلبه نهائيا بالاخير لانها تسبب مويات وانتي بالاخير تبين تنشفين فسوي نفس التمره بس بدال الحلبه حطي رشاد
ولا يضرها ان سويتيها قبل بوقت انا سويتها قبل الولاده بشهر وحطت حق كل يوم بقصدير وجمعتهم كلهم في عبله وسكرت عليهم مضبوط عشان الريحه(راح تسوين 40 حبه 20 منهم بالحلبه و20 منهم بالرشاد)

وبالنسبه للقهوه ايوه صح عليك اللي يصير فيها مسمار القهوه العاديه بس بدون هيل يعني وحطي معاها شوي زنجبيل
واي سؤال حبيبتي انا حاظره ولا يردك الا كيبووردك

solafy
08-28-2007, 08:57 AM
ااااااااااااااه ياهمس الله يعينك بس ويعيني معاك كانك تتكلمين عني.....:frxxagir..


نفس الظروف بالضبط..لكن انتي في اي ولايه انا ففرجينيا..


الله يقومك بالسلامه

ونصايحي لك شوفي من ينصح ههههههههههههه:frut5ragi
بس هذا اللي ناويه اسويه وجربته من قبل الشوربه افرزنها حتي لو باللحم مايضرها انشالله ابد..

والحلبه تري لقيتها في البقاله العربيه..
واذا انتي خكريه تراهم يبيعونها هنا علي شكل حبوب في محلات الفيتامينات ..

هذا شي

اما الرشاد فانا مالقيته شكلهم مايعرفونه..


وسلامتك



اختي محبه الرحمن

اللله يسعدك وين مارحتي مدري حبيتك من دون ماشوفك:h45r4

انتي في اي ولايه


ولو تعرفي وين يبيعو الرشاد تكوني عملتي معروف..

همس وتناهيد
08-28-2007, 12:23 PM
محبة الرحمن 11الله يعافيك مره دخلت مزاجي فكره توزيع التمر.........بس حبيت اسألك مثلا علبتين التمر الصغيره كم احط عليها مقدار من الحلبه والزبده..........بعد ودي اسألك اقدراسوي تعرفين التمر اللي يسوونه اهل الرياض يحطون عليه دقيق مع الزبده(القشد)هذا بعد اقدر افرزنه.......بالنسبه للماش والله ما اعرفه او يمكني اعرفه ونسيته........على العموم اوصفيه لي لأن الوالده الله يحفظها وانا جايه من السعوديه حطت لي اشيا كثيره بعضها ما عرفتها.....والله يعافيك

همس وتناهيد
08-28-2007, 12:30 PM
solafyهلا وغلا فيك........ياعمري عليك نفس الحاله هه..........بس عادي تفرزنين شوربه بلحم؟؟........احس باللحم صعبه يمكن احط ماجي اوكيه .......لكن اذا طريقتك صحيا عادي واللله ودن تفتك ونفرزنها باللحم..........الشي الثاني الحلبه والرشاد وخرابيط النفاس انا جبتها معاي من السعوديه انا نزلت وانا بالرابع وخذيت كل شي الحمد لله..............بس الرشاد اللي عندي لسا حبوب الظاهر يبي لي اطحنه .......والحلبه عندي نوعين حبوب وومطحون............وهذا سؤالي لمحبة الرحمن اللي والله انك يا solafyنفس الشعور تجاهها ...........حاسه انه خطيره ومتابعه لها قبل انها ترد على بموضوعي

همس وتناهيد
08-28-2007, 12:31 PM
ايه على فكره انا بولايه نبراسكا

همس وتناهيد
08-28-2007, 01:20 PM
بنات ودي بعد اسأل عن الكورن فليكس..........عادي افطر عليه .؟........لانه سهل وانا احبه مع الحليب الحار........وش رايكم وقت الزنقات افطر عليه ولا ما يصلح للنفاس؟؟؟؟

GLORIOUS
08-30-2007, 03:38 PM
ااااااااااااااه ياهمس الله يعينك بس ويعيني معاك كانك تتكلمين عني.....:frxxagir..


نفس الظروف بالضبط..لكن انتي في اي ولايه انا ففرجينيا..


الله يقومك بالسلامه

ونصايحي لك شوفي من ينصح ههههههههههههه:frut5ragi
بس هذا اللي ناويه اسويه وجربته من قبل الشوربه افرزنها حتي لو باللحم مايضرها انشالله ابد..

والحلبه تري لقيتها في البقاله العربيه..
واذا انتي خكريه تراهم يبيعونها هنا علي شكل حبوب في محلات الفيتامينات ..

هذا شي

اما الرشاد فانا مالقيته شكلهم مايعرفونه..


وسلامتك



اختي محبه الرحمن

اللله يسعدك وين مارحتي مدري حبيتك من دون ماشوفك:h45r4

انتي في اي ولايه


ولو تعرفي وين يبيعو الرشاد تكوني عملتي معروف..

هلا يا حبيبتي اوسوري على التأخير بالرد..
انا في ولايه كليفورنيا
والله حبيبتي ما اعرف وين يبيعونه لان انا جبته معي من السعوديه..بسأل لك البنات اللي عندي واذا لقيت معلومه عنه على طووول بقول لك يا عسل

GLORIOUS
08-30-2007, 03:43 PM
محبة الرحمن 11الله يعافيك مره دخلت مزاجي فكره توزيع التمر.........بس حبيت اسألك مثلا علبتين التمر الصغيره كم احط عليها مقدار من الحلبه والزبده..........بعد ودي اسألك اقدراسوي تعرفين التمر اللي يسوونه اهل الرياض يحطون عليه دقيق مع الزبده(القشد)هذا بعد اقدر افرزنه.......بالنسبه للماش والله ما اعرفه او يمكني اعرفه ونسيته........على العموم اوصفيه لي لأن الوالده الله يحفظها وانا جايه من السعوديه حطت لي اشيا كثيره بعضها ما عرفتها.....والله يعافيك

هلا والله عيوني واسفــــــــــــــــــــه على التأخير بالرد والله ما انتبهت

شوفي انا اقيس كمية التمر بمقدار مسكة اليد ..يعني اخذ شوي تمر وعلى قد ماتشيل يدي اسويه حق يوم..ولا يغرك المقدار ترا يدي صغيره...لان ما اعرف مقاس العلب اللي تتكلمين عنهم بس يجي قد اصغر طبق للشوربه..يعني كأنه مليان (التمر يكون معبووووط) ايوه وتقدرين تفرزرين القشد ..لان هو نفس الطريقه اللي قلت لك اللهم زيدي عليها حلبه..
والماش ما ادري كيف اوصفه لانه جاني مطحون وجاهز بس ريحته مميزه وطعمه مر شوي وفيه لذعه(تحسين انه حااار مثل الفلفل بس على طريقه ثااانيه..>>>>>>>>>>ياعيني على الوصف

طيب اسألي الوالده الله يخليها لك وشوفي يمكن ما طحنته وتقدرين تستدلين عليه من وصفها..
الله يقومكم بالسلااامه ويهووون عليكم واي خدمه انا حاااااضره

GLORIOUS
08-30-2007, 03:45 PM
solafyهلا وغلا فيك........ياعمري عليك نفس الحاله هه..........بس عادي تفرزنين شوربه بلحم؟؟........احس باللحم صعبه يمكن احط ماجي اوكيه .......لكن اذا طريقتك صحيا عادي واللله ودن تفتك ونفرزنها باللحم..........الشي الثاني الحلبه والرشاد وخرابيط النفاس انا جبتها معاي من السعوديه انا نزلت وانا بالرابع وخذيت كل شي الحمد لله..............بس الرشاد اللي عندي لسا حبوب الظاهر يبي لي اطحنه .......والحلبه عندي نوعين حبوب وومطحون............وهذا سؤالي لمحبة الرحمن اللي والله انك يا solafyنفس الشعور تجاهها ...........حاسه انه خطيره ومتابعه لها قبل انها ترد على بموضوعي

شووفي لا تطحنين الرشااااااااااااااد
ماله فايده اذا طحنتيه مثل اذا كان حب
>>>>>>>>>>>>>قامت تتفلسف عقب المدح
ولا تستحوووووووووون اي شي اسألو تراني حاضره...:floiushag

همس وتناهيد
09-01-2007, 07:46 PM
هلا والله عيوني واسفــــــــــــــــــــه على التأخير بالرد والله ما انتبهت

شوفي انا اقيس كمية التمر بمقدار مسكة اليد ..يعني اخذ شوي تمر وعلى قد ماتشيل يدي اسويه حق يوم..ولا يغرك المقدار ترا يدي صغيره...لان ما اعرف مقاس العلب اللي تتكلمين عنهم بس يجي قد اصغر طبق للشوربه..يعني كأنه مليان (التمر يكون معبووووط) ايوه وتقدرين تفرزرين القشد ..لان هو نفس الطريقه اللي قلت لك اللهم زيدي عليها حلبه..
والماش ما ادري كيف اوصفه لانه جاني مطحون وجاهز بس ريحته مميزه وطعمه مر شوي وفيه لذعه(تحسين انه حااار مثل الفلفل بس على طريقه ثااانيه..>>>>>>>>>>ياعيني على الوصف

طيب اسألي الوالده الله يخليها لك وشوفي يمكن ما طحنته وتقدرين تستدلين عليه من وصفها..
الله يقومكم بالسلااامه ويهووون عليكم واي خدمه انا حاااااضره
هلا محبة الرحمن
سويت التمر اللي قلتي عليه بس فاحت ريحه البيت حلبببببببببه ويوم ذقته ما استستغت طعمه حسيته ما كانه تمر المهم زودت عليه قشد وسنوت اذا تعرفينه اللي هو نفسه الشمر قلت يغطي على حموضه الحلبه وقصدرته وعلى الفريزر ......والله يصبرني على طعمه كيف كان الطعم معاك انتي كنت متقبله ولا صعب مثلي

همس وتناهيد
09-01-2007, 07:50 PM
شووفي لا تطحنين الرشااااااااااااااد
ماله فايده اذا طحنتيه مثل اذا كان حب
>>>>>>>>>>>>>قامت تتفلسف عقب المدح
ولا تستحوووووووووون اي شي اسألو تراني حاضره...:floiushag
اشوى انك قلت لي ولا كنت ناويه اطحن الرشاد................بعدين حلوه صوره العجوز مسويه كبيره تعطينا نصايح ........ترا دارين ان ما عندك غير بنت وحده بس..................ههههههههه.............عادي تفلسفي خذي راحتك ......والله قاعد تعطينا نصايح حلللللللللوووووه..........مره شكرا لك

قطيف الورد
09-02-2007, 01:41 AM
حبيبتي شيء مؤسف ان نفاسك الاول في الغربة لكنه من اجل مستقبلك انت وزوجك وابنائك
اما من ناحية غذاء النفساء اللي الاحظه في فرق من منطقة الى اخرى واهم شي ان يكون الغذاء صحي ومتنوع مثلا في الفطور كلي تمر على الريق واشربي حليب ساخن وبيض مسلوق او اي نوع وجبن وخبز مع شرائح من الخضار طماطم او خيار او خس وتقدري تنوعي يعني مرات يعمل لك زوجك كبدة لانها مفيدة للنفساء وعصير برتقال او اي نوع اخر والغذاء بيكون متنوع ارز ولحم اودجاج او سمك مع سلطة متنوعة من الخضار وانواع من الفواكه وتمر وزبادي وعصير وفي العشاء اي نوع خفيف مثل مكرونة وشوربة خضار وفاكهة وتمر وعصير اولبن او محاشي وقبل النوم اشربي حليب دافي مع ملعقة عسل طبيعي وتقدري بين الوجبات تاكلي فواكه تفاحة مثلا او خضار مثل الخيار وتشربي حلبة
واحنا عندنا شي اسمه عصيدة نعمله للنفساء نحمص طحين اماراتي رقم اثنين لكن للنفساء مانحمصه كثير ونضيف له سكر وماء بعد ننخله في غربال او مصفا خاص ونخلط المقادير وندورها على النار لين تنشف وانت تتحكمي في ليونتها وبعدين تقدميها في طبق وتوضعي عليه الدهن والمقادير كوبين طحين كوب سكر اربعة اكواب ماء ودهن للتسطيح بس ما اعتقد الطحين متوفر عندك وهذا تقدري تحمصيه قبل وتضعيه في الثلاجة او الفريزر وتؤكل في اي وقت في الصباح والمساء وهذه تقوي النفساء
اما الاشياء اللي بتفرزنيها علشان زوجك المعجنات والسمبوسة والورق عنب والبروستد وعندك اللقيمات ما تطول وبتكون مفيدة بدبس التمر ولاتنسي تخلي زوجك يصير شيف قبل لا تولدي علشان يجهز الاكل من الليل اما من ناحية الفطور ما اعتقد صعب وجبة الغذاء هي اصعب شي
اختي ليه ما تحاولي ان اختك مثلا تسافر لك لمدة اسبوعين ثلاثة علشان تساعدك خالتي كانت مثلك في امريكا ولما توضع اي احد من قرايبنا يسافر لها ويساعدها لان اصعب شي ان في رمضان نفاسك علشان انت وزوجك بتتعبوا لا وخالتي جربت الولادة ثلاث مرات في امريكا ورابع واخر مرة في السعودية ولما جتهم بعثة حرمت ترجع الظاهر الغربة تعقد الله يعينكم ويصبركم ويسهل عليك ولادتك ونفاسك

حمامة لطيفة
09-02-2007, 04:54 AM
هلا والله كيف الحال
انا نففففففففففففففففففس الشي وخايفه وربي انشالله بساعدني باقي علي شهرين انشالله
بجي لي الوالد بنفسني خخخخخخخخخ الله يساعد ابوي يعرف يطبخ واختي قطيف الورد ماقصرت حسيت كلامها ميه ميه باخلي ابوي يسوي لي عصيده انشالله والاشياء دي
بس زوجي مررررررررره مايعرف يطبخ
انا ولاية اورجن

همس وتناهيد
09-02-2007, 02:43 PM
قطيف الورد مشكوره على النصايح الرائعه مره .......الاكله اللي وصفتيها اعتقد احنا عندنا مثلها اكله مقاربه ولكن بدون سكر والطحين بدون حمص......يعني انا مثلا عندي طحين دبي جبته معاي من السعوديه واحط في القدر مقدار من الطحين ومقدار من الحليب واذا مافيه حليب سايل مويه مع كم ملعقه حليب نيدو.....وتجلسين تحركينها على النار بخفاق البيض لين تتماسك وتغلي (لانها زي الباشاميل يتكون فيها تكتلات )ولما تغلي تقصرين عليها لمده ربع الى ثلث ساعه علشان تنضج كويس........وبعدين تقدمينها مع العسل مررررررره لذيذه ومفيده واحنا نسميها لهيده وانشا الله اعلمها زوجي.
وبالنسبه لاي احد من قرايبنا .......انا ما عندي اخوات اكبر مني انا اكبر وحده وامي ماتقدرتجي لان عندها اطفال محتاجينها اكثر مني .......وبيني وبينك ودي امي اذا بتجي اكون في قوتي واقدر ابسطها عندي مو تجيني تخدمني........يله لازم اتعود القوه .........هذا امهاتنا ما كانوا يروحون عند امهاتهم وماشا الله ماشي حالهم .........الله ييسر علي بس

همس وتناهيد
09-02-2007, 02:45 PM
حمامه لطيفه.................خخخخخخخخخخخخخ ضحكتيني من جدك بيجي الوالد.....ماشا الله اخاف بعدين انتي اللي تطبخين له بس والله غريبه احس الرجاجيل ما يعرفون شي حدهم كاسة شاي .......

توتي الصغيره
09-02-2007, 03:20 PM
شوفي اهم شي حليب مع فلفل او دارسين اوحلبة
وزيني لك شوربة وكثري فيهاالفلفل
ولامرقة خضار الخضار قطعيه الحين وحطيه بالفريز وحطيه فلفل اسود لاانه زين للوالدة
دارسين ولاازنجبيل الكراث تراه زين للنفسا
ترا الاكل مهم بالنسبا لالاوالدة
شوفي سوي الحين سمبوسة وحطيهابالفريز
ويارب يارحيم تسهل عليك الولادة
ويارب احمل في القريب العاجل انتي ادعي لنا

ليال الحلوه
09-03-2007, 07:38 AM
والله يسهل عليك وعلي قولي امين
انتي باقي لك كم وتولدين

همس وتناهيد
09-03-2007, 06:20 PM
توتي الصغيره مشكوره على النصايح الحلوه بس انا سمعت ان الفلفل الاسوديتعب الطفل خصوصا اذا الام ترضع طبيعي ويجيب له مغص............اما الكراث اه شهيتيني اياه .......ما عندنا هنا كراث

همس وتناهيد
09-03-2007, 06:22 PM
ليال حلوه انشا الله الدكتوره محدده لي الاربعاء الجاي واليوم الاثنين يعني بعد بكره

ام العيال2005
09-03-2007, 07:10 PM
مرحبا همس الله يهون عليك وعلي انا بعد موعد ولادتي الاربعاء

والله اني بالدمام واهلي بجده وحاسه بغربه الله يعينكم

اختي اهتمي بنفسك زين بالنفاس والاكل اهم شي واللي تهمل نفسها بعد الولاده تندم طول عمرها

شوفي حبيبتي انا بالنسبه لي اسوي المرقوق بالخبر العربي العادي او بالفطاير الجاهزه اللي على الصاج تباع

جاهزه والله كل من يذوقه ينهبل عليه ويسالني عن عجينته خخخخخخخخخ

والشوربه اشتري صدور دجاج او افخاذ مقطعه وسوي مسلوقه مع فلفل اسود وكمون وماجي وليمون والله رهيبه ومفيده وسهله

وعندك اهم شي الصبح سويلك ترمس حليب ابيض مع حلبه وزنجبيل وكلي معه تمر او عصيده او عريكه

او بيض مسلوق اهم شي تعبين بطنك لا تقعدين بدون اكل

واشربي شاي اخضر مع مراميه و نعناع ويانسون واي شي عندك

وسوي قهوه من القشر والزنجبيل وبالنسبه للرشاد والحبه السوداء ممكن تحطينها مع عسل وتخلينها بعلبه

وتاخذين كل يوم ملعقه على الريق او تحطينهم بكوب الحليب الصبح

وعندك موضوع خبيرة الاعشاب اللي بقسم الطب البديل فيه اشياء بتفيدك كثير ادخليه اقري طريقة الحسو

انا عجبني وشكلي بسويه

https://alfrasha.maktoob.com/showthread.php?t=332875

همس وتناهيد
09-04-2007, 12:14 AM
ام العيال مشكوره على النصايح الحلوه...........اجل انتي بعيده عن اهلك .....الله يعينك......ويعيني
بس بسألك انتي اول نفاس ولالا

ام العيال2005
09-04-2007, 12:53 PM
لا حبيبتي مو الاول عندي خير ولله الحمد

انا كنت بعمرك يوم تزوجت وبعدت عن اهلي بس اول نفاس كان عند امي الله يحفظها

والله امس طول الوقت افكر فيك واقول يمدي امك قلبها يتقطع عليك بالذات انك بكريتها وهذا اول حفيد

همس وتناهيد
09-04-2007, 08:05 PM
هلابام العيال.............كويس طيب يعني عندك خبره من قبل تقدرين تمشين حالك وتعتنين بالبيبي......موب مثلي الله يستر.....بس حاستك خايفه وناسيه عن الولاده شكل لك فتره من اخر ولاده ..........لا وابشرك موعد الولاده اخرته الى الاسبوع الجاي لان ما عندي ذيك الطلوق والر حم مفتوح 5سم.........انتي لسا على موعدك الاول الاربعاءولالا؟

ام العيال2005
09-04-2007, 08:10 PM
لا مو خايفه بس هذا الحمل غير من اوله لاخره تعب وثقل

بس كيف الرحم مفتوح 5سم وما فيه طلق هذا ولاده خلاص

همس وتناهيد
09-05-2007, 02:41 AM
هلا بام العيال.........يمه خوفتيني.......مدري بس الدكتوره قالت ايش رايك......تبين بكره ولاده قلت لهاباستنى اسبوع زياده علشان ما عندي طلق لاني لو رحت لهم بيعطوني طلق صناعي يمكن لو صبرت لين الاسبوع الجاي يجيني طلق طبيعي.......بعدين احس ما فيه خطر دام ان مويه الجنين ما نزلت.

همس وتناهيد
09-05-2007, 02:45 AM
هلا بام العيال.........يمه خوفتيني.......مدري بس الدكتوره قالت ايش رايك......تبين بكره ولاده قلت لهاباستنى اسبوع زياده علشان ما عندي طلق لاني لو رحت لهم بيعطوني طلق صناعي يمكن لو صبرت لين الاسبوع الجاي يجيني طلق طبيعي.......بعدين احس ما فيه خطر دام ان مويه الجنين ما نزلت.

ام العيال2005
09-05-2007, 03:32 AM
حبيبتي كيف طلق صناعي وليش الرحم مفتوح طبيعي ما يحتاج

واصلا المفروض ما يطلعونك من عندهم بس غريبه

والله ما ودي اخوفك بس مستغربه من كلامك

ام العيال2005
09-05-2007, 04:31 AM
وينك لا تحسسيني بالذنب ولا تخافين اكتبي واسألي البنات يمكن فيه

احد صار معه مثلك وادعيلي شكلي بولد اليوم وعقبالك قريب ان شاءالله

همس وتناهيد
09-05-2007, 07:06 AM
اهلين ......والله رحت مشيت اليوم وكأني بديت احس بانقباضات احس زي الحجر ببطني.........بس قولي لي وين المشكله لو تاخرت ...............خليني اعتبر نفسي ايام زمان ايام البدو الحرمه ما تولد الا لما يحما الطلق ما كان عندهم زينا الحين قياسات لعنق الرحم ومدري وشو........الموهم لنتي حمستيني اسال البنات


Content Relevant URLs by vBSEO 3.6.0